Метаданыя — гэта службовая інфармацыя, якая аўтаматычна захоўваецца ў файле. Яна прысутнічае ў фотаздымках, відэа, дакументах (PDF, Word), аўдыяфайлах і іншых фарматах.
Метаданыя могуць утрымліваць:
- дакладныя GPS-каардынаты здымкі;
- дату і час стварэння;
- мадэль прылады;
- серыйныя нумары;
- імя ўладальніка прылады або аўтара дакумента;
- гісторыю рэдагавання;
- назву арганізацыі (у офісных дакументах).
Нават калі вы нічога не напісалі ў тэксце і не паказалі свой твар, метаданыя ўсё роўна могуць раскрыць больш, чым сам файл.
Метаданыя дазваляюць:
- вызначаць вашу геалакацыю;
- вызначаць, дзе вы жывяце або дзе рэгулярна бываеце;
- звязваць розныя ананімныя публікацыі на аснове мадэлі прылады;
- пацвярджаць, што файл быў створаны пэўнай асобай або арганізацыяй;
- даказваць час і месца здымкі.
Гэта можа прывесці да дэананімізацыі крыніцы, усталявання кантактаў і нават фізічных пагроз. Калі рызыка высокая, метаданыя варта выдаляць перад кожнай публікацыяй або перадачай файла.
Як выдаліць метаданыя ў фотаздымках
- iPhone/iPad
Выдаленне геалакацыі:
- Адкрыйце дадатак «Фотаздымкі» і выберыце выяву.
- Націсніце кнопку інфармацыі або правядзіце пальцам уверх.
- Націсніце «Рэдагаваць» і выберыце «Выдаліць геатэгі».
Важна: гэта выдаляе толькі даныя пра месцазнаходжанне. Іншыя метаданыя (мадэль прылады, дата і г.д.) могуць застацца.
Каб цалкам адключыць геалакацыю для камеры, перайдзіце: Налады → Канфідэнцыяльнасць і бяспека → Сэрвісы геалакацыі → Камера → Ніколі.
- Android
Назвы элементаў могуць адрознівацца ў залежнасці ад версіі сістэмы.
Выдаленне геалакацыі:
- Адкрыйце праграму «Галерэя» і выберыце фотаздымак.
- Націсніце на тры кропкі і адкрыйце раздзел «Падрабязнасці»/«Інфармацыя».
- Выдайце даныя геалакацыі і захавайце змены.
Каб цалкам адключыць геалакацыю для камеры, перайдзіце: Налады → Праграмы → Камера → Дазволы → Адключыць доступ да геалакацыі.
Звярніце ўвагу: калі фотаздымак сінхранізаваны з воблакам або адрэдагаваны з дапамогай праграм іншых вытворцаў, ранейшая версія можа быць захавана.
Дадатковыя меры для высокай рызыкі
- Зрабіце скрыншот фота і адпраўце яго замест арыгінала.
- Выкарыстоўвайце месенджэры, якія аўтаматычна выдаляюць метаданыя пры адпраўцы. Яны таксама сціскаюць файл і яшчэ больш скарачаюць метаданыя. Але калі вы адпраўляеце файл як «дакумент», метаданыя могуць захавацца.
- Праверце ўласцівасці файла перад адпраўкай (на камп’ютары — «Уласцівасці» → «Падрабязнасці»).
- Выкарыстоўвайце прафесійныя інструменты для ачысткі метаданых, такія як ExifTool або MAT2 (Metadata Anonymisation Toolkit). Апрацоўка файла павінна праводзіцца па-за сеткай, на надзейнай прыладзе, без загрузкі на іншыя анлайн-сэрвісы. Не выкарыстоўвайце сумнеўныя і неправераныя праграмы для ачысткі метаданых, бо яны могуць збіраць вашы файлы або ўтрымліваць шкоднасны код.